مقال | لماذا استثمر في العقار وبلاش الذهب و الدولار !!

كل الناس اللي محوشة قرشين ونفسها تكبرهم، أو المسافرين برة ونفسهم يشتروا بيت في بلدهم عشان يأمنوا مستقبل أولادهم، بيكونوا دايما محتارين ايه هي أفضل وسيلة للاستثمار.

 خبراء العقارات، اتكلمو معانا عن أفضل أوجه الاستثمار، وقالوا إن العقار أفضل وأضمن من الذهب والدولار، والاسباب هي

  لأن العقار أضمن ومربح بشكل سنوي بيزيد حوالى20 % من سعر الوحدة -.

 يعني الوحدة اللي تمنها 100 ألف جنيه، بعد سنة بتبقي أكتر من 120 ألف جنيه، ودا معدل التضخم السنوي المعتاد فى الأسعار.

كمان الاستثمار في الدولار يعتبر استثمار غير وطني، ومش مضمون الأيام دي مع مشاكل العملة في البلد.

أما الذهب فسوقه واقف من 5 سنين من 25 يناير 2011 والدليل على كدا إن ورش ذهب كثيرة جداً اتقفلت الفترة الاخيرة عشان مبقاش في سوق  للذهب.

الاستثمار في العقار أضمن لأن قيمته بتزيد بإستمرار، وممكن كمان تعظم الإستفادة منه بطرق تانية، زي تأجيره على شكل وحدات سكنية أو إدارية—- ومكاتب فهتلاقي ألف طريقة تجيب منه فلوس.

كمان العقار أفضل لأنه مطلوب دايماً، كل الناس بتدور على سكن سواء شباب أو أُسر عاوزة تنقل من أحياء لمناطق تانية، وعلى الرغم من ارتفاع الأسعار المستمر إلا إن الطلب عليه عمره ما يتوقف.

العقار هو وديعة ينفع تحتفظ بها لوقت الأزمات بدون أى أعباء مالية أو نسب مثلاً كنسب الودايع في البنوك، كمان ممكن تستفيد به كضمان في البنوك لو احتجت تاخد قرض.

السنوات الأخيرة أثبتت إن العقار هو أفضل إستثمار لإنك ممكن تشتري شقة بحوالي 100 ألف جنيه وتأجرها، أو تنتظر لما أسعارها تزيد ولو معاك أكتر ممكن تبقى مقاول صغيّر، وتشارك حد وتبنوا عمارة وتعملوا أرباح متضاعفة على رأس المال اللي بدأتوا بيه .

ومهم إنك تعرف إن الإستثمار العقاري مش شقق بس، إنما أراضي وعمارات وفيلات، وكل قطاع منهم بيتوقف على الفلوس اللي معاك.

لكن لو فكرت تستثمر فلوسك في أراضي لازم تكون مساحة صغيرة عشان تعرف تبيعها بعد كدا، لأن السوق لا يحتمل حالياً مساحات كبيرة أو هتدخل وقتها فى شراكة مع حد يبني على الأرض وتتقاسموا الأرباح .

ولو كنت مشغول وماعندكش وقت للإستثمار في العقار، ممكن تمول أحد ملاك الأراضى أو المقاولين بشرط جديته وبشرط أنه يكون مستثمر حر،  مش بيبني لصالح الحكومة، لأنه في الغالب هياخد أرباحه ويأجل أرباحك للدفعات المتأخرة.

لضمان إستثمارك في عقار معين، لازم تسأل عليه جهات معينة، ويُفضّل الإستثمار في العقارات في المدن الجديدة، بشرط إنها ماتكونش تابعة للدولة أو حصل عليها فرد من الدولة بدعم معين، لأن العقارات المدعومة من الحكومة لا تُباع أو يُستثمر فيها. كمان لازم تتأكد إن العمارة مرخصة وغير آيلة للسقوط.

النقطة الأخطر في إستثمارك في العقار هي إنك تحدد هدفك وإمكانياتك المادية، لأن كل مشروع وله مخاطره عشان كدة لازم تدرس المنطقة اللي هتستثمر فيها قبل اتخاذ قرار الشراء.

والأهم من دة كله إنك لازم تفرّق بين هدفك في الاستثمار وبين اللي هتسمعه من السماسرة، لأن شغلتهم هي إقناعك بالوحدة تحت أى ظرف، وبدون مراعاة أى مصلحة ليك، ودة طبعا عشان ياخدوا عمولتهم وخلاص.. تمام كدة؟