الفرق بين الايجار والتمليك للشقق السكنية !!
- كلنا بنحتار قبل ما ناخد قرار الشراء للوحدة اللي هنعيش فيها نأجرها ولا نشتريها أحسن ، لكن طبعا في النهاية بتحكمنا الموارد المالية وقدرتنا على الشراء أو الإيجار .
طبعا للإيجار مميزات وللشراء مميزات وعيوب برضه لكن مش بس إمكانياتنا المادية هي بس اللي بتحكمنا في القرار ده إنما كمان ظروف شغلنا وهدفنا من شراء العقار وهل هو لفترة قصيرة أو طويلة وهل لغرض معين مثلاً زي شغل مؤقت في مدينة معينة أو مكان معين ولا هنفضل فيها بقية حياتنــا.
كمان أهم ميزة في الإيجار إنك بتستلم وحدتك فورا وجاهزة ومتشطبة مش هتحتاج تغير فيها كتير ودي بترجع بينا تاني لهدفك من الوحدة اللي بتدور عليها .
- الإيجار والشراء زي ماليهم مميزات زي ماليهم عيوب برضه بنعاني منها ولو بدأنا بالإيجارمثلاً هتلاقي إن عيوبه أكتر طبعا لأنه غالباً بيكون مرتبط بفترة معينة بتكون الغرض من الإيجار .
إنما ده ممكن يكون ميزة برضه لو إنت بتغير سكنك كل كام سنة حسب ظروف شغلك وكمان من مميزاته إنك بتستهلك الوحدة بدون أى أعباء مالية للصيانة أو الترميم ومش هيفرق معاك إرتفاع قيمتها أو إنخفاضها وكمان التنقل كل فترة ممكن يكون من هواياتك فتقدر تغير مكان وحدتك كل فترة ده غير إنه مش هيحملك أعباء مالية تقدر تتملك بيها وحدتك .
- لكن من الناحية التانية برضه خلينا نقول إنك كل الفلوس اللي بتدفعها في الشقة الإيجار مبترجعش بإي منفعة ليك وإنما هي قيمة إستهلاكك للعقار وكمان رفع الإيجار كل مدة هيتعبك مع إرتفاع الأسعار .
إنما إنك تشتري شقتك أو فيلتك فبتضمن أولاً إن فلوسك بتستثمرها فيها مش بتدفعها عالفاضي زي الإيجار، كمان أي صيانة بتعملها فوحدتك بترفع سعرها السوقي بشكل كبير
ده غير انك مش هتقلق على الوحدة بعد سنين كتيرة لأن العقار في مصر بيزيد كل سنة مش بيقل فدا بيكون إستثمار برضه تقدر تستثمر فيه أموالك ، كمان لازم يكون قرار الشراء مدعوم بهدفك أو خط حياتك وشغلك عشان تقدر تسكن في مكان قريب من مكان شغلك لأنك مش هتشتري وتبيع كل شوية إنما هيكون إستقرار ليك لفترة كبيرة .
- أما بقي عيوب الشراء هي إنك مش هتقدر تغير مكان سكنك بسهولة وكمان المقدم الكبير اللي بتدفعه في الأول وده يخلينا نرجع برضه لإمكانياتك وهدفك من الوحدة تقدر تشتريها ولا تأجرها أحسن ، دا غير أعباء الصيانة والترميم اللي بتعتبر عيب وميزة فنفس الوقت لأنها بترفع سعر وحدتك بشكل مستمر في السوق إنما كمان هتكون ملتزم بيها كل فترة .
- اما الديكورات طبعاً تقدر تتحكم فيها فشقتك اللي هتشتريها على عكس الشقة اللي هتأجرها هتستلمها متشطبة فهتكون مفروضة عليك ديكوراتها ومش هتقدر تغيرها لأنك هتوفر فلوسك في حاجة بتاعتك مش حاجة ساكن فيها وهتسيبها وتمشي .
إرسال تعليق